La ricercje di un spazi adat dulà podê scoltâ stant lontan dai rumôrs dal om al è simpri l'obietîf dal Dxer, ven a stâi la pussibilitât di cjapâ tal aiar i debui segnâi di radios locâls che a vegnin di tieris lontanis.

Cun chest spirt e cun chel di dâ une volte professionâl ae nestre ativitât di scoltadôrs "di cjase" e je nassude la necessitât di cjatâ une localitât che nus permetès la poie di antenis BEVERAGE avonde lungjis pal nestri targhet di scolte e di une struture juste par ospitâ un piçul grup di personis cu lis relativis strumentazions tecnologjichis pe radio scolte.

Dopo une curte e sfortunade esperience inte zone di Aquilee, la intuizion e lis cognossincis locâls di Valter Comuzzi nus àn puartât su la Aviosuperficie "Bruno De CANDIDO" di Blancjade in provincie di Udin (45° 47' 30" Nord - 13° 4' 30" Est).

Tantis sodisfazions e cualchi piçule delusion leade ae propagazion a àn compagnât chescj cuatri agns di spedizions noturnis inte lagune furlane, tra lis faturis di dovê fâ sù la sere e disfâ la buinore lis antenis par no dâ fastidi al trafic aeri la tecnlologjie de scolte si è rafinade, si è evolude e cumò o podìn disponi di gnûfs imprescj e strumentazions adatis a lis nestris esigjencis, il grup iniziâl si è slargjât a gnûfs passionâts e ospits, di marcâ che tai ultins doi agns il "grup principâl" al à partecipât a doi Dxpedition invernâi a PARKALOMPOLO - SVEZIA (67° 73' Nord - 22° 85' Est) une sorte di MASTER in Dxing tal cidin artic de Lapponia Svedese.

Il spirt di chest sît nol è autocelebratîf, al è invezit un ringraziament a dutis lis personis che in chescj agns cun passion e dedizion a àn lavorât par che si podès disponi di une struture decorose par podê praticâ un hobby, no ultin al vûl jessi un stimul par chei che a volaran/podaran provâ a doprâ altris locazions scuindudis e favorevulis a la radio scolte estreme.